Búginde basy daýǵa qalyp, tyǵyryqqa tirelgen «Er-Taý» JSHS 2014 jyldyń jeltoqsan aıynda Astana qalasyndaǵy Kenesary men Shevchenko kósheleriniń qıylysynan jer ýchaskesin satyp alyp, óz qarjysyna kóppáterli turǵyn úı keshenin salýǵa 2018 jyldan bastap kirisedi.

Sol kezde «Nurly Jol-K-2008» JSHS» dırektory N.A. Áskerova men ókili A. I. Dergachev keledi de, ınvestor retinde jumysty júrgizýge usynys tastaıdy. Bir aıǵa aldyn ala kelisimshart jasalǵan soń, olar mamandary men tehnıkasyn ákelip, tipti qarjylyq múmkindigin kórsetetin qujattar usyný kerek bolǵan. Biraq aldyn ala kelisimshartta páter satý týraly eshteńe jazylmasa da, ózge de mindettemeni moınyna alǵany týraly qujat túzilmese de, odan qala berdi aıtylǵan sharttyń birin júzege asyrmasa da, sol kúni-aq páterlerdi úleskerlerge sata bastaǵan. Olardyń bul qıturqy áreketin birden baıqaǵan negizgi qojaıyny «Er-taý» JSHS quzyrly organdarǵa júginedi. Quqyq qorǵaý organdary birden teksermegendikten 89 páter satylyp ketken. Der kezinde dabyl qaǵyp úlgerse de únine eshkim qulaq aspaǵan kompanıanyń qurylys jobasy 35 paıyzǵa aıaqtalyp, oryndalǵan jumystyń quny jer ýchaskesimen birge 3905 800 927 teńgeni quraǵan. Alaıda «Er-Taý» JSHS ózi ıelik etetin jer ýchaskesinen de, turǵyn úı kesheninen de joldan qosylǵan kúmándi kompanıanyń kesirinen aırylyp qalýy múmkin.

Kompanıa óz quqyǵy men zańdy múddesin qorǵaý maqsatynda 2021 jyldyń aqpanynan bastap 2023 jyldyń mamyr aıyna deıin quqyq buzýshylyqqa qatysty Astana qalasynyń prokýratýrasy, polısıasy jáne Astana qalasynyń ákimdigi, qalalyq orta sapasy jáne baqylaý basqarmasynyń atyna, quqyq qorǵaý jáne memlekettik organdarǵa aryz túsirse de, eshqandaı áreket bolmaǵan.

«Er-Taý» JSHS dırektory Murat Tasovtyń aıtýynsha, Astana qalalyq memlekettik arhıtektýralyq qurylysty baqylaý basqarmasyna aryzdanǵan.

«Biz de jalǵan kompanıaǵa aldandyq emes pe? Bizge de shyǵyn keldi. Biraq bizdiń múlikti úleskerlerge bere saldy. Aqylǵa syımaıtyn nárse oryn alǵan soń, muny reıderlik áreket deýge negiz bar. Eń soraqysy – bul memlekettik organdardyń qolymen jasalyp otyr. «Nurly Jol-K-2008» JSHS-ne shara qoldanýdyń ornyna bizdi jaýapkershilikke tartýǵa tyrysyp, úleskerlerdiń aldynda boryshker etip qoıdy», – deıdi Murat Tasov.

Osylaısha, «Nurly Jol-K-2008» JSHS kesirinen zardap shekken úleskerlerdiń shyǵyny «Er-Taý» JSHS-ne ilinip otyr. Zańger Erkinbek Myńjanovtyń aıtýynsha,  jer ýchaskesi de jekemenshik ıeliginde.

«Osydan-aq «Er-Taý» JSHS-niń konstıtýsıalyq quqyǵy buzylyp tur. Bul nysandy salý zańdy tulǵa – «Er-Taý» JSHS quzyretinde. Alaıda, úleskerler satyp alarda saýattylyq tanytyp, zańdy qujat talap etpegeni qalaı? Qazir bizdiń qolymyzda aldyn ala brondaý men qurylysqa úlesker bolý týraly kelisim-sharttyń zańsyz ekeni týraly sot aktileri bar. Áý basta «Nurly Jol-K-2008» ústinen alaıaqtyq baby boıynsha, is qozǵalǵanmen, quqyq qorǵaý organdary «Er-Taý» JSHS-ne materıaldyq zalaldyń bolmaýyna baılanysty degen jeleýmen qylmystyq isti toqtatyp tastady», – deıdi zańger Erkinbek Myńjanov.

Jábirlenýshi tarap munyń artynda sol kezdegi GASK basqarma bastyǵy bolǵan Dáýlet Dosqulovtyń qatysy bar ekenin aıtyp, «Osy zańsyzdyq árekettiń bári Dosqulov pen onyń qoldan jasalǵan úleskerleriniń kesirinen bolyp otyr. Ákimdik janyndaǵy vedomstvoaralyq komısıa reıderlikpen aınalysady. «Nurly joldyń» basshylyǵy qylmysy úshin sottaldy, biraq oǵan bizdiń qanshalyqty qatysymyz bar degenge eshkim bas qatyrmaıdy. El Prezıdentinen osy zańsyzdyqqa aralasýyn suraımyn!», – deıdi kompanıa basshysy Murat Tasov.

Aıtpaqshy, kompanıa jasyryn túrde júrgizilgen tergeýge nysandy óz qarjysyna salǵanyn dáleldeıtin barlyq qujatty usynsa da, bul qylmystyq is materıalynan alynyp tastalǵan. Sebebi, qurylys jobasyn tartyp alý birinshiden ákimdikke, ekinshiden úleskerlerge, úshinshiden alaıaqtarǵa tıimdi. Al shyǵyn kásibin adal bastap, júrgizip kelgen «Er-Taý» JSHS-niń moınyna ilinbek. Kompanıa óz múligin qaıtaryp alý úshin bul reıderlik áreketke arasha túsýin surap, Prezıdent ákimshiline, Prezıdent atyna jáne Bas prokýratýraǵa hat jazdy. Endigi ádil sheshimdi solardan ǵana kútedi.

Alaıda «Astana» telearnasyna Qalalyq orta sapasy jáne baqylaý basqarmasy pikir bildirip,  aıaqtalmaǵan qurylys pen jer ýchaskesin turǵyn úı qurylysy kooperatıviniń paıdasyna berý týraly Joǵarǵy sottyń sheshimin ǵana oryndap jatqanyn jetkizdi.

«Zardap shekkender qatarynda qurylysqa aqsha salǵan júzdegen úlesker bar ekenin aıta ketý kerek. Biraq bul kompanıa buǵan esh qatysymyz joq dep otyr», – dedi Qalalyq orta sapasy jáne baqylaý basqarmasy ókilderi.